രുചികളാണ് മനുഷ്യരെ തമ്മിലിണക്കാന് പറ്റിയ മാര്ഗം- ടൂറിസം ഡയറക്ടര്
കേരള പാചകമത്സര വിജയികളുടെ സംസ്ഥാന സന്ദര്ശനം സമാപിച്ചു
Kochi / September 3, 2022
കൊച്ചി: രുചികളിലൂടെയാണ് മനുഷ്യര് തമ്മില് ഏറ്റവും ഊഷ്മളമായ ബന്ധമുണ്ടാകുന്നതെന്ന് കേരള ടൂറിസം ഡയറക്ടര് പി ബി നൂഹ് പറഞ്ഞു. കേരള പാചകമത്സര വിജയികളുമായി കൊച്ചിയില് നടത്തിയ കൂടിക്കാഴ്ചയില് സംസാരിക്കുകയായിരുന്നു അദ്ദേഹം. ഇവിടെ നിന്നുള്ള മധുരിക്കുന്ന ഓര്മ്മകളിലൂടെ സ്വന്തം രാജ്യത്ത് കേരളത്തിന്റെ ബ്രാന്ഡ് അമ്പാസിഡര്മാരായി മാറാന് ഇവര്ക്ക് കഴിയുമെന്നും അദ്ദേഹം പ്രത്യാശ പ്രകടിപ്പിച്ചു. പാചകമത്സരത്തിലെ പത്ത് വിജയകളാണ് കുടുംബസമ്മേതം ടൂറിസം വകുപ്പ് ഒരുക്കിയ കേരള സന്ദര്ശനത്തിനെത്തിയത്.
ഇന്ത്യയിലെ മറ്റ് സംസ്ഥാനങ്ങളില് നിന്നുള്ള അഞ്ചും വിദേശത്തു നിന്നുള്ള അഞ്ചു പേരുമാണ് പാചകമത്സരത്തിലെ വിവിധയിനങ്ങളില് വിജയിച്ചത്. മറ്റ് സംസ്ഥാനങ്ങളിലും മറ്റ് രാജ്യങ്ങളിലുമുള്ള ജനങ്ങളുമായി വ്യക്തിബന്ധം വര്ധിപ്പിക്കുക, സാംസ്ക്കാരിക-രുചിസംബന്ധിയായ ആശയവിനിമയം കൂട്ടുക, കേരളത്തിന് വിദേശങ്ങളില് പ്രചാരം നല്കുക എന്നീ ഉദ്ദേശ്യങ്ങളാണ് പാചകമത്സരത്തിലൂടെ ലക്ഷ്യം വച്ചിരുന്നതെന്ന് പി ബി നൂഹ് പറഞ്ഞു.
വിദേശരാജ്യങ്ങളുമായുള്ള നൂറ്റാണ്ടുകള് പഴക്കമുള്ള വാണിജ്യബന്ധം കൊണ്ടു തന്നെ ഇവിടുത്തെ ഭക്ഷണ ശീലങ്ങളില് ഏറെ വൈവിദ്ധ്യം ദര്ശിക്കാനാകും. അതിനാല് തന്നെ ഇവിടുത്തെ പാചകശീലങ്ങള് സ്വന്തം രാജ്യത്ത് സമന്വയിപ്പിക്കാന് എല്ലാവരും ശ്രമിക്കണം. സുഗന്ധവ്യഞ്ജനങ്ങള് തേടിയെത്തിയ ഓരോ യൂറോപ്യന് സഞ്ചാരിയും കേരളത്തിലാണ് ആദ്യമെത്തിയതെന്നോര്ക്കണമെന്നും അദ്ദേഹം പറഞ്ഞു.
ഇടറുന്ന ശബ്ദത്തോടെയാണ് യുകെയില് നിന്നെത്തിയ അഥീന അയോണ പാന്റ സംസാരിച്ചത്. ഇത്രയും ആഴത്തിലുള്ള ആതിഥേയത്വം തന്റെ ജീവിതത്തില് ഇതു വരെ അനുഭവിച്ചിട്ടില്ലെന്ന് അവര് പറഞ്ഞു. കുടുംബത്തില് നിന്ന് വിട്ടു പോകുന്നതു പോലെയാണ് എട്ട് ദിവസത്തെ കേരളജീവിതത്തില് നിന്നും തിരികെ പോകുമ്പോള് തോന്നുന്നതെന്നും അവര് പറഞ്ഞു.
മോറോസോവ് നികിത(റഷ്യ), റോക്സാന ഡാന സൈലാ(റുമേനിയ), യുകി ഷിമിസു(ജപ്പാന്), രമാലക്ഷ്മി സുന്ദരരാജന്(തെലങ്കാന), ജയ നാരായണ്(മഹാരാഷ്ട്ര), ഹിമനന്ദിനി പ്രഭാകരന്(കര്ണാടക), വിന്നി സുകാന്ത്(ആന്ധ്രാപ്രദേശ്) എന്നിവരായിരുന്നു മത്സരത്തിലെ മറ്റ് വിജയികള്. വിജയികള്ക്ക് സര്ട്ടിഫിക്കറ്റുകളും ഉപഹാരമായി ആറന്മുള കണ്ണാടിയും പി ബി നൂഹ് നല്കി.
കേരള ടൂറിസം മൂന്നോട്ടു വയ്ക്കുന്ന മലബാര് ടൂറിസത്തിന്റെ ഭാഗമായി സന്ദര്ശനം കൂടുതലും വടക്കന് കേരളം കേന്ദ്രീകരിച്ചായിരുന്നു. കണ്ണൂര്, കോഴിക്കോട്, വയനാട് ജില്ലകളിലെ സന്ദര്ശനത്തിന് കൂടുതല് പ്രാധാന്യം നല്കി.
രാജ്യത്തിനകത്തും പുറത്തുമുള്ള മലയാളികളല്ലാത്ത ആര്ക്കും പങ്കെടുക്കാവുന്നതായിരുന്നു കേരള പാചക മത്സരം 2020-21. 2020 ഡിസംബര് 21 മുതല് 2021 ജൂണ് 21 വരെയാണ് ആദ്യം ഇതിനുള്ള സമയം നിശ്ചയിച്ചിരുന്നതെങ്കിലും അഭൂതപൂര്വമായ പ്രതികരണം നിമിത്തം 2021 ആഗസ്റ്റ് 21 വരെ സമയം നീട്ടി നല്കി. മൊത്തം 11,605 പേര് മത്സരത്തിനായി രജിസ്റ്റര് ചെയ്തിരുന്നു.അതില് 8600 പേര് രാജ്യത്തിനകത്തു നിന്നും 2,629 പേര് വിദേശത്തു നിന്നുമായിരുന്നു. വീഡിയോ എന്ട്രികള് കേരള ടൂറിസത്തിന്റെ വെബ്സൈറ്റില് അപ് ലോഡ് ചെയ്യുകയും പൊതു വോട്ടെടുപ്പിന്റെ അടിസ്ഥാനത്തില് വിജയികളെ തെരഞ്ഞെടുക്കുകയുമാണ് ചെയ്തത്. പ്രാഥമികമായ തെരഞ്ഞെടുപ്പിന് ശേഷം 359 വീഡിയോകള്(319-ഇന്ത്യ, 40- വിദേശം) അപ് ലോഡ് ചെയ്തു.